Salman Khan film Pakistan-ah chhuah lo mai thei
Salman Khan channa film thar Tubelight chu Pakistan-ah chhuah a ni lo mai thei a, Pakistan-a tihchhuah a nih loh chuan he film hian cheng vbch 35 vel a hloh thei dawn niin an chhut.
Tubelight film hi Pakistan-ah hian Eid lai a nih dawn avangin a buaithlak dawn. Pakistan-ah Muslim kût Eid laia film tihchhuah a hlawk lo hle. Chu mai bakah tualchhung film lian pahnih tihchhuah tur a awm bawk. Pakistani film tihchhuah turte hian Salman Khan channa hi Eid hunlaia an rama an tichhuak a nih chuan an sumdawnnain a chhiat phah nasa hle dawn, tiin thuneitute hnenah Tubelight film hi tichhuak lo turin an nawr a ni.
Eng emaw thil neuh neuh avangin India film eng emaw zat chu Pakistan-ah tihchhuah loh a ni ṭhin. Aamir Khan-a film Dangal kha Pakistan-ah tihchhuah a ni lo a, a chhan chu he film-ah hian India hnam hla leh India flag te tihlan a nih vang a ni. Pakistan lam chuan heng thil pahnih hi Pakistan-a tihchhuah turah chuan tibo turin a hriattir a, mahse Aaamir Khan hian a ngai angin a kalpui ta zawk a, chuvang chuan an tichhuak ta lo a ni.
Tubelight film hi Rs. vbch 100 senga siam a ni a, June 23 hian tlangzarh a ni ang. He film hi India leh China indo lai, 1962 kuma mi behchhana siam a ni. He film-ah hian Shah Rukh Khan pawh 'lang ve zuai' ang type-in a chang niin an sawi. Chinese actress, Zhu Zhu a chang bawk. India hmar lama thingtlang khaw pakhata thil thleng anga tarlan a ni.