Charlize Theron channa tur 'Jane'

Sci-fi author Phillip K. Dick biopic siam tur 'Jane'-ah 'The Italian Job' star Charlize Theron chu a chang dawn.

Kum 46 lai ni ve tawh Charlize Theron channa tur film hi Alfonso Cuaron chuan a siam dawn a, author Phillip K. Dick leh a phirpui, a farnu Jane-i chanchin tur niin an unau inlaichinna chungchang tarlan a ni ang. Phillip K. Dick farnu Jane hi a pian aṭanga kar ruk lekah a boral a, chu chu Dick hian a tuar hle niin an sawi a, a kut chhuak tam tak pawh hei hian a 'influence' niin an sawi bawk.

Hollywood film lar 'Blade Runner' leh 'Total Recall'-te pawh kha Dick-a lehkhabu behchhana siam a ni a, a thawnthu ziah pakhat 'The Man in the High Castle' phei chu Amazon-in TV Series-ah an siam hial tawh a ni.

Charlize Theron hi producer zingah a tel nghal dawn a,Cuaron leh Phillip-a fanu Isa Hackett-te nen an produce ho dawn.

South African lemchan thiam Charlize Theron hi 'Doctor Strange in the Multiverse of Madness'-ah pawh khan a end-credit scene-ah a inlan zuai tawh a, MCU lamah a chevel kan hmu chho dawn niin a lang. 'Jane' bakah hian project eng emaw zatah a tel a, kuminah hian a channa 'The School for Good and Evil' chu tlangzarh a ni dawn a, nakkum lamah a channa tho 'Fast X' chu tlangzarh leh tur niin kum 2024-ah 'Fast & Furious 11' chu tlangzarh a ni bawk ang. Kum 2020-a tlangzarh 'The Old Guard' pawh kha a chhunzawmna an siam leh dawn a, chutah pawh chuan Theron hi a chang leh dawn a ni.