North East India Festival 2022 Bangkok-ah Mizo Designer leh Mizo model-te kal

Zirtawpni aṭanga Pathianni thleng neih, North East India Festival 2022 Bangkok-ah Mizo Designer Mami Khawlhring label name 'Dear Zo' chu North East leh Mizoram aiawh tura thlan a ni a, hetah hian Mizo model, Miss Mizoram lo ni tawh pathum- Rody Hniahlum, Zirsangpuii leh Thanthani Tuallawt-te bakah Mizo model lar Nunui Rualhleng-te chu an inlan bawk.

North East India Festival 2022 Bangkok-a neihah hian Dr.Rajkumar Ranjan Singh, Union Minister of External Affairs chu khuallian a ni a, Nagaland Chief Minister Neiphiu Rio, Meghalaya Chief Minister Conrad Sangma, Arunachal Deputy CM Chowna Mein leh Robert Romawia, Mizoram Minister of Tourism, Union Minister R.K Ranjan (External affairs), Assam Minister of Handloom &Textile Urkhao Gwra Brahma, Ambassdor of India to Thailand Suchitra Durai leh Thailand-a an Top Official eng emaw zat pawh an tel.

Mami Khawlhring (Dear Zo) hian Mizorama kan thar chhuah leh neih- Moso bamboo aṭangin fibre lachhuakin puanthan a siam a, eri silk nen pawlhin thawmhnaw a showcase a ni. Showstopper-ah Assam lemchan thiam Pretti Konkona a hmang bawk.

Rody Hniahlum, Zirsangpuii, Thanthani Tuallawt leh Nunui Rualhleng-te hi India hmarchhak state hrang hrang aiawh tura an thlan chhuah designer-te tan an walk bawk a, lawm an hlawh hle.

Kumin North East Festival hi North East state hrang hrang Commerce & Industries, Handloom & Handicrafts, Tourism, Culture & Arts te chawilarna tura buatsaih niin, kumin North East Festival hi India-Thailand diplomatic Relations kum 75 nih lawmna puala buatsaih a ni.