September-ah album thar BORN PINK

Blackpink chuan September thla hian album thar an tichhuak dawn a, an album thar tur hming chu 'Born Pink' tih a ni dawn.

Jennie, Lisa, Jisoo leh Rosé-te chu hemi chungchang hi tichiang tawhin social media lamah pawh an puangzar tawh a, Blink tan chuan awm mai maina chi a ni tawh lo!

K-Pop girl band lar hian hun eng emaw chen aṭang tawh khan album thar nen an rawn 'comeback' dawn tih an sawi ri deuh reng tawh a, kar hmasa lawk pawh khan PUBG in-game virtual concert neiin hemi kaltlang hian single thar 'Ready for Love' chu an 'drop' nghe nghe a nih kha.

August thla hian an album thar tur 'title track' an tichhuak dawn bawk a, October thla hian world tour an nei bawk ang. Band angin hun eng emaw chen thawm an nei tawh loa, amaherawhchu kumin hi chuan thawm rawn neih rin an tum hle. An album thar tur trailer tawi chu an YouTube channel lamah leh Instagram lamah pawh an dah chhuak tawh a ni.

YG Entertainment chuan Blackpink album thar tur chungchangah hian thuchhuah siamin,"An comeback project tur hming chu 'Born Pink' tih a ni a, Blackpink awmze kawk tur tak a ni a, chu chu thil mai mai a ni ngai lo," tiin an tarlang.

"Hun rei tak ata tawh khan Blackpink-esque music hi buatsaih a ni tawh. Rimawi thar leh project liantham tak piah lamah hian Blackpink chuan K-pop girl group chanchina world tour lian ber kum tawpah hian an nei dawn bawk a ni," tiin an sawi bawk.

Jisoo, Jennie, Rosé, leh Lisa-te hian August 2016 khan an single album hmasa ber Square One chu an tichhuak a, an larpui nghal rem rem hle. Studio album pangngai tak erawh an la tichhuak tam loa, Korean album 'The Album' chu kum 2020 khan tichhuakin Japanese album 'Blackpink in Your Area' chu kum 2018 khan an tichhuak tawh bawk. 'Born Pink' hi an studio album pathumna tur chauh a ni a, Korean album phei chu pahnih an tihchhuahna tur chiah a ni.