Wonder Woman aiin Cars 3 a ropui zawk

Wonder Woman chu chawlhkar thum chhuah a nih hnu chuan a tla­hniam a, pakhatna a luah reng thei ta bik lo. Kar liam ta chhung khan North America-ah chuan Wonder Woman ai hian animated movie, Cars 3 a ropui zawk.

Cars movie pathumna, Cars 3 hian a hmaa a film-puite sum lakluh tam lamah pha lo mah se, Cars 3 hi North America-a kar liam taa sum lalut hnem ber a nih loh phah chuang lo. Kar liam ta chhung khan he animated movie hian USD mtd 53.5 a lalut.

Wonder Woman chu chawlhkar thumnaah pawh USD mtd 40.8 lai a lalut thei a, mahse pakhatna erawh a luah zo ta lo. He film hian North America aṭang chauhin USD mtd 274.6 zet a lalut tawh a, khawvel pumah chuan USD mtd 571.8 lai a thawk chhuak tling ta.

Tupac Shakur-a chan­chin movie-a an siam chu pathumnaah a awm pha. Hip-hop khawvela mi ropui leh tun thlenga a chanchin sawi bâng lo, Tupac Shakur-a chanchin movie, ‘All eyez on me’ chu Tupac-a kum 46 tlinna champha, Zirtawpni khan tihchhuah ṭan a ni a, theatre 2,471-a chhuah a ni a, USD mtd 27.1 a lalut.

Box office movie

“Cars 3” - $mtd 53.5

“Wonder Woman” - $mtd 40.8

“All Eyez on Me” - $mtd 27.1

“The Mummy” - $mtd 13.9

“47 Meters Down” - $mtd 11.5

“Pirates of the Caribbean: Dead Men Tell No Tales” - $mtd 8.5

“Rough Night” - $mtd 8

“Captain Underpants: The First Epic Movie” - $mtd 7.4

“Guardians of the Galaxy Vol. 2” - $mtd 5

“It Comes at Night” - $mtd 2.6