Teen Choice Awards Nomination an puang chhuak
Kum tina award an sem ṭhin, tleirawl leh ṭhalai naupang zawktena an duhzawng an thlanna, Teen Choice Awards nomination list tihchhuah a ni a, TV huang chhungah chuan Pretty Little Liars hi tleirawl zingah chuan a tla na ber mai zawng a nih hi.
Pretty Little Liars TV drama hi Choice TV Drama Show-ah nominate a ni a, heta a changtu Ian Harding chu Choice Drama TV Actor-ah a lang a, a changtu hmeichhe lamah Ashley Benson, Lucy Hale, Sasha Pieterse leh Troian Bellisario te chu TV Actress-ah an lang bawk. Famous In Love-ah Bella Thorne a lang bawk.
Movie lamah chuan Vin Diesel channa ten hmun an chang sang viau. A channa pahnih - xXx: Return of Xander Cage leh The Fate of the Furious te hi nominee-a lang hnem an ni a, an pahnih hian category pangaah ve ve an lang. Logan, Pirates of the Caribbean: Dead Men Tell No Tales leh Transformers: The Last Knight te chu lang hnem dang an ni.
A changtute lamah chuan Vin Diesel a langsar a, The Rock, Chris Pine, Hugh Jackman leh Johnny Depp te chu langsar dang an ni. Hmeichhe lamah Deepika Padukone, Nina Dobrev leh Ruby Rose te an langsar bawk. Gal Gadot pawh hi sawi hmaih loh tur chi a ni.
Music lamah hian Harry Styles leh Selena Gomez te category pathumah ve ve an lang a, lang hnem ber an ni. Hming langsar dangte chu Drake, Beyonce Knowles, Rihanna, Nicki Minaj, Ariana Grande leh Katy Perry te an ni. Rock band lamah chuan Linkin Park, Imagine Dragons leh Twenty One Pilot te hi tleirawl zingah an tla na.
Kumin Teen Choice Awards-ah hian kum danga awm lo category - Choice Throwback TV Show te siam thar a ni. Teen Choice hi August 13 khian sem a ni ang a, sem dan tur leh show kalpui dan tur kimchang erawh puan chhuah a la ni lo.