Kepler-in planet dang 200 chuang hmuchhuak Nunna awm theihna tur ang chi 10
Kepler spacecraft chuan solar system danga planet 219 zet mai a hmuhchhuah belh leh a, heng exoplanet a hmuhchhuah belh zinga 10-ah te hian nunna a awm thei mai thei niin NASA chuan a tarlang.
Scientist-te chuan vanthengrengah khian nunna awm theihna tur âwm ang an zawng a, solar system dang an hmuchhuak zel a, planet pawh tuna 219 an hmuhchhuah belh te nen 4034 zet an hmuchhuak tawh. Tuna planet dang an hmuhchhuah zinga 10 te chu nunna awm theihna tur khawp ni êng leh lum dawng nia ngaih an ni.
NASA scientist-te chuan Kepler mission hnuaiah planet 2,300 chuang hmuhchhuah a nih tawh thu an sawi a, heng zinga 30 emaw, a aia tam mah emaw chu kan chênna khawvel tiat a ni. Tuna an hmuhchhuah thar zinga 10 te kan chênna khawvel nen a intiat tlang hle a, anmahni arsi an helna kawng hlat lam pawh kan khawvelin Ni a helna hlat lam nen a inthlau lo hlawm hle. Kan khawvelin ni a helna hlat lam nena a inan viau chuan heng exoplanet 10-ah te hian nunna a awm thei dawn tihna a ni.
Uluk taka an zirchian hnuah kan khawvel anga nunna awm theihna tur planet hi 50 vel lai a ni ta a, kan khawvel nena inang ber chu K77-11 a ni. He planet hian khawvelin ni aṭanga energy a dawn ang zat thuak a dawng a, khawvel ai hian tlemin ni aṭangin êng leh lum a dawng ṭha hret chauh. Lei ai hian tlemin a lian hret bawk. NASA hian planet dangah te nunna a awm leh awm loh te, nunna awm theihna chi a nih leh nih loh te an zirchiang reng a, exoplanet 4,034 an hmuhchhuah tawhah 2,335 te an zirchiang tawh. Mithiam rualte hian he solar system ni lo, vanthengreng chhunga solar system dangah te nunna emaw, alien an awm leh awm loh hi an thlithlai reng a ni.