PUMP leh MZI ten charity concert buatsaih dawn
Mizoram hmun hrang hranga leilung chhiatna thleng avanga tuarte ṭanpuina turin PUMP leh MZI te chuan charity concert nei turin an inbuatsaih mek. PUMP hian Zonet kaltlangin Live Phone In programme an hmang tawh bawk.
People United In Music with a Purpose (PUMP) hian June 17 zan khan Zonet Cable TV kaltlangin Live Phone In programme an hmang a, heta ṭang hian cheng nuai chuang lut tura beisei a ni a, pawisa a la lut mek a, lut tur eng emaw zat a la awm. PUMP chuan Live Phone In programme an hman ṭuma anmahni ṭawiawmtute leh mi inphalte chungah an lawmzia an sawi.
Vawiin chhun dar 12 aṭang hian Vanapa Hall kawtah charity concert an buatsaih dawn a, heta ṭanga pawisa an hmuh te hi ṭanpuina atana hman vek tur a ni. PUMP hian Aizawl khawpui chhung hmun hrang hrangah bawm an hung bawk dawn a, harsatna tawkte ṭanpuina tur a ni tih hre reng a, theihtawpa anmahniṭawiawm turin mipuite an ngen. Vawiina charity concert-ah hian tuilian leh leimin tuarte tan vehbur khawn a ni dawn a, SBI : account no 33026547405 IFSC code : SBIN0016361 ah ṭanpuina hi pek theih reng a ni bawk
MZI chuan zanin LPS I kaltlangin Live Phone In programme “HELP” an hmang dawn. Hei bakah hian June 23 leh June 24 te hian Aizawl khawpui hmun hrang hrangah mobile concert an nei dawn a, charity concert pui ber hi June 29 chawhnu dar 2 aṭangin Vanapa Hall-ah an buatsaih bawk ang. MZI hian headquarters, sub headquarters leh branch hrang hrangte chu anmahni huam chhungah theih ang ang ṭan lo la turin ngenna an tichhuak tawh. London MZI chuan vehbur an khawn mek a, US-a MZI te pawhin hma an la dawn. Manipur MZI pawhin theihtawp chhuah an tum bawk.