Simon-a Grenfell tower charity hla a chhuak

London-a Grenfell Tower kâng tuarte ṭanpui nan hla an tichhuak dawn tih Simon Cowell chuan a sawi hnuah he hla hi nimin khan tihchhuah a ni.

A hmain Simon Cowell hian a record label hnuaia zaithiamte nen Grenfell Tower kâng tuar ṭanpuina hla siam an tum thu hi a lo sawi chhuak tawh a, nimin khan he hla hi an tichhuak ta. He hlaah hian Louis Tomlinson, Robbie Williams leh Brian May te chu zaithiam zai zinga mi an ni a, UK-a radio station-ah te play a ni. An hla hming hi ‘Bridge over troubled water’ a ni a, American zaithiam pahnih - Simon & Garfunkel te hla, kum 1970-a an tihchhuah tawh kha a ni. Zaithiam hrang hrangte Simon Cowell hian saktirin, he hla aṭanga sum an hmuhte hi ṭanpuina atana hman tur a ni.

Music video pawh tihchhuah a ni dawn a, he video hi UK-a mite chauh en theih turin ITV-ah pek chhuah a ni ang. He hla an siam dawn hian zaithiamten Simon Cowell hi an be nasa hle a, tel ve an duh thu an hrilh hlawm. Simon chuan ‘Ka phone hi a ri tawp thei lo emaw tih mai tur khawp a ni,’ a ti hial.