Stream theih a hlate a dah chhuah hnuah Swift-i’n streaming a hlawkpui ; Billboard chart-ah a san belh

Streaming platform-ah, zaithiam­ten royalty an dawn ṭhina a lungawi loh avangtein streaming site-a a hla awmte a dah chhuah vek hnuah tun­hnai aṭang khan Taylor Swift chuan a hlate a dah lut leh a, a hlawkpui. A album te Billboard 200 chart-ah an rawn lang thar leh.

June 9 aṭang khan Taylor Swift hian a album leh hlate streaming site-ah a dah chhuak leh a, hei vang hian a album-te a hlawhtlin thar leh phah hle. A studio album panga lai chu Billboard 200 chart-ah a lang leh. 1989 album chu top 40-ah rawn chuang kai lehin, 31-na a rawn ni pha leh a, he album hi top 40-a a lan lohna chin pawh kum khat aiin a rei tawh.

Taylor Swift hlate hi a hma aiin streaming equivalent ang pawha hralh hnem a ni a, za zela 551 ngawt­in a pung a ni ber. Audio stream-ah a hmaa maktaduai 7.3 chauh stream a ni ṭhin kha, a hla zawng zawngte a dah takah chuan streaming hi maktaduai 47.51 zetah a kai chho. 1989 album ringawt pawh kha maktaduai 18.85 zet stream a ni.

Red album pawh kha 88-naah rawn kai chho a, Fearless kha 119-naah a rawn lang leh bawk. Red album hi equivalent album te nen unit 8000 vel hralh ang a ni a, Fearless album hi unit 5000 hralh ang a ni. Ama hminga album a tihchhuah, hmana mi kha unit 3000 vel hralh ang a rawn ni thei bawk.