Mizo Idol Season 7 ; Aizawl audition zaninah ṭan dawn ta

Mizo Idol Season 7 Aizawl audition chu zaninah ṭan a ni dawn ta.

Mizo Idol 2022 audition hi July 20 zan aṭang khan ṭan ni tawhin Champhai District-ah Elimination round neih hmasak ber a ni. Aizawl pawn district hrang hrangah neih chhunzawm zelin tunah chuan Aizawl pawn bik hi chu zawhfel a ni tawh a, Thawhlehni zanah khan result pawh puanfel ni tawhin mi 44 laiin district audition hi an paltlang a ni.

Zanin dar 6:30 aṭangin Aizawl audition hi ṭan a ni dawn a, mi 200 chuang inlan tur awmin Bawhbel leh Zonet YouTube channel lamah live-in a en theih ang.

Aizawl audition-ah hian Mizo Idol hmasa lama kan lo hmelhriat tawh Robin-a leh Rinzauva-te chu endiktu an ni leh dawn a, anni bakah hian Jaui chu a tel dawn bawk. Angelina V.L.Hriatpuii leh Zonuni Pachuau-te chu host an ni dawn bawk a ni.

Mizo Idol Season 7-a pakhatna hian Rs Nuai hnih leh Yamaha Aerox scooter a dawng dawn a, pahnihna chuan Rs Nuai khat a dawng anga, pathumnain Rs 70,000 a dawng thung ang. Kumin hian Mizo Idol form lachhuak hi mi 400 chuang an awm a ni.