Darbu-ah Saved an rawn inlar e

Mizo gospel band chhuak thar beiseiawm, Saved chuan official-a anmahni pual hla an siam hmasak ber "Pathian Pakhat" tih chu an peihfel ta a, Darbu app-ah ngaihthlak theih turin an chhawp chhuak.

Mizoram chhul chhuak music-streaming application hmasa ber Darbu-ah Saved hla thar 'Pathian Pakhat' hi nizan aṭang khan Rs. 15-a lei theihin chhawpchhuah a ni a, ngaihthlak a manhla hle - Darbu-ah hian Mizo hla nalh tak tak ngaihthlak tur a awm nual.

Saved vocalist leh an hla Pathian Pakhat tih hla phuahtu ni bawk Ramdinpuia Sailo chuan,"Pathian hnena inhlanna, ṭawngṭaina hla a ni a, Pathian thutak puanchhuahna a ni tel bawk," tiin Vanglaini a hrilh.

Ramdinpuia chuan,"Mizo mipuite, a bik takin music lama tui mite kan hla tlawm tak hi min lo leisak turin kan sawm a, he hla kaltlang hian Pathian a inpuan kan ring tlat bawk a ni," a ti.

Pathian Pakhat hi music arrangement a fuh a, vocalist aw a nalhin a 'pa' a, tun hnaia Mizo gospel band hla thar zinga ngaihthlak tlak ber pawl a nih a rinawm. Saved hian hla thar ṭha tak tak tihchhuah zel an tum thu a sawi.

Saved tih hi Rom 10:13-a “Tu pawh Lalpa hming lam apiang chhandam an ni ang,” tih a ni si a, tih behchhana hming phuah a ni.