Batgirl movie siam tur an ṭhulh

DC Comics live-action film thar tura tih Batgirl chu an siam leh dawn lo niin The Wrap chuan an tarlang.

Warner Bros. chuan he film siamna atan hian $maktaduai 90 vel lai seng turin ruahmanna an siam vek tawh a, an chang ṭep tawh tihah film siam tur chu an ṭhulh leh ta thut niin The Wrap chuan a tarlang. Kumina tihchhuah hman an tum film hi achangtu tur pawh an tifel vek tawh a ni.

Warner Bros. hian Batgirl siam tur chiah hi an ṭhulh loa, Scoob! chhunzawmna tur 'Scoob!: Holiday Haunt' pawh an siam leh dawn lo tih an puangzar bawk. He film pawh hi $mtd 40 vel senga siam an tum a ni a, mahse tunah chuan an siam leh rih dawn lo tih an tichiang tawh.

Thuchhuah an siamah The Wrap chuan Warner Bros. thutlukna siam chu kawng dang zawh an tum vang a nih thu leh Barbara Gordon lema chang tur an tihfel tawh Leslie Grace 'performance' nen inkungkaihna a neih loh thu an tarlang. Warner Bros. Pictures thupuangtu chuan,"Leslie Grace hi lemchan thiam talent nei ṭha tak a ni a, tuna thutlukna kan siam hian a 'performance' nen inkungkaihna a nei lo. Batgirl leh Scoob! Holiday Haunt siamtute chungah kan lawm takzet a, hun lo la awm leh turah pawh thawhho leh ngei kan beisei a ni," a ti.