Lalthansangi US-ah a 'Heidenrial' dawn ; Music video album US-ah a tichhuak nghal ang

‘Heidenrial’ nena Zoram khawvela a fan chhuah hnu khan Sangtei chanchin hi kan hre tam ta lo hle a, lehkha zirlai lamah a hun pumin a hmang. Hei vang hian kum 2013-a Australia-a zai tura an sawmna pawh a tihlawhtling thei lo. Sangtei hian Motiwala Homeopathic Medical College & Hospital, Nashik-ah BHMS (Bachelor of homeopathy in medical and surgery) 3year a zir mek. US pan hian July 15 khian Mumbai a chhuahsan ang.

Sangtei hian tun hi India ram pawna zai avanga a kal vawi khatna tur a ni lo. Australia-a a kal theih loh hnu hian kum 2016 khan Malaysia-ah zai turin a lo kal tawh a, hemi hnu lawk hian Australia-a UPC pastor, Ming Cung Nung kaihhruainain Australia-ah gospel concert nei turin a kal leh a, Melbourne khawpuiah concert hi a zu nei a ni.

US-ah hian Indianapolis-a UPC ten biak in an hawnnaah a zai dawn a, gospel concert a nei nghal bawk ang. Indianapolis-ah hian Lai hla music video album a buatsaih ‘Nemte in an auh’ chu a tlangzarh ang. He album-ah hian hla 10 lai a dah a, musician ṭha ber ber - Victor, Ephraim, Kima Chhangte, Lalrindika, Larry tena music an siamsak a ni a, Gosen Recording-a an record a ni. Video hi SVP kutchhuak a ni a, album hi Rev. Ming Cung Nung produce a ni.

‘Heidenrial’ hla hmanga Zoram khawvelin kan hriat lar, Lalthansangi (Sangtei) chu USA-a kal turin a inpuahchah mek a, US-ah hian zai turin a zin dawn a, a music video album pawh a tichhuak nghal ang.