Boris Becker a tlachhia

Tennis khawvela mi ropui ṭhin Boris Becker chu official takin a tla­chhia tih puan chhuah a ni a, tunah hian £ mtd 3.34 zet private bank-a leiba a nei. A leibatte pe thei tur dinhmun­a a din tak loh avangin ‘tlachhia’, bankrupt-a puan a ni ta a ni.

Tennis khawvela mi ropui leh sum vaw chhuak hnem, tennis court aṭanga sum tam tak hai­luttu hi tennis court pawn lamah nun dan a thiam loh avang leh, hringnun inkhelh dan a khelh thiam loh avangin a tlachhe ta a ni ber. Kum 17 mi chauh a nih a, Wimbledon-a a cham­pion hmasak ber khan pound maktaduai tam tak a lalut a, mahse a nun kawng a zawh fimkhur loh avangin sum a nei ta lo.

Russian model, Angela Ermokova nen an inzui a, fanu, tunah chuan kum 17 mi an nei a, a fanu enkawlna tur hian £ mtd 2 zet court chuan pe turin a ti a, £ mtd 2 a pe. American mi Barbara chu nupuiah a nei leh a, mahse a hnuah a ṭhen leh. Barbara a ṭhen avang hian £ mtd 11 zet a chân a, chu bakah chuan Miami-a an nupa in, £ mtd 2 chu a hloh bawk. An fate pahnih, Noah leh Elias te enkawl zui nan sum ṭhahnem tak a hman a ngai bawk.

Kum nga kalta khan a leiba chi hrang hrang avangin Majorca khuaa a villa nuam leh ropui tak chu Spanish court chuan a lilamsak tawh a, mahse a hnuah a in hi engtin tin emaw a tlan chhuak leh thei. Germany-ah pawh tute emaw a sumdawnpuina hlawhchhamah £ nuai 8 pe tura tih a ni. A leiba neihte hi nitin £677-in a pung a, Boris Becker dan hremi chuan court hnenah leiba a neihte hi Becker hian a pe thei a, Majorca-a a in hi a hralh chuan a pe tla vek thei ti mah se, Bankruptcy and Companies court chuan a dan hremi ngenna hi hnawlin tlachhiaah a puang ta a ni. Christine Derrett, registrar chuan Boris Becker hian a leiba tlak theihna tur khawp thil hlu dang, in leh lo emaw, engmah dang a nei tawh lo niin a sawi.