Billboard Artist 100 Pakhatnaah Katy Perry
A album thar ‘Witness’ hit-zia a lanna chu he album siamtu Katy Perry hi Billboard Artist 100-ah pakhatnaah a awm.
Billboard Artist 100-ah hian a hmain Katy Perry hi 44-naah a awm a, Witness album a tihchhuah meuh chuan a hmaa awm mi 43 te khumin, pakhatna a rawn kai ta dawrh a ni. Billboard Artist 100 kum 2014-a an siam aṭanga pakhatnaa Katy Perry a awm vawi khatna a ni.
Katy Perry hian record a rawn siam a, pakhatna luah tur hian Artist 100 chart-ah chawlhkar 149 a awm hman. Pakhatna nih hmaa Artist 100-a lang rei ber ni ṭhin chu Bruno Mars a ni a, chawlhkar 114 hnuah pakhatnaah a rawn kai a, Katy Perry hian a rawn khum.
‘Witness’ hi Katy tan hetiang dinhmun a thlen theihna lian ber a ni. Billboard 200 chart-ah pakhatna a luah a, chawlhkar khat chhungin copy 180,000 zet a hralh a nih kha. Billboard 200 chart-a pakhatna luah thei a album pathumna a ni. Prism leh Teenage Dream te khan pakhatna an luah a, amaherawhchu heng album a tihchhuah lai khan Artist 100 chart hi an la siam lo. Artist 100-ah hian Ed Sheeran chu pahnihna niin, Bruno Mars chu pathumna a ni.