Praise On pathumna Cindy Lalthanpuii video

Synfo-in a buatsaih, Praise On-a pathumna, Tlangnuam, Aizawl nula, Cindy Lalthanpuii chuan a music video hmasa ber chu a siam peih a, Zonet lamah pawh dah fel a ni ta.

Cindy Lalthanpuii music video hmasa ber hi ‘A mawi ber’ tih hla a ni a, C. Vanlalvuana lehlin a ni a, a letlingtu pawh hian a lo sa tawh a, Central KṬP album-ah pawh dah a nih tawh kha. Kha hla, lar tak ṭhin kha Cindy hian thiam takin a rawn sa a, a music video hmasa ber atan a thlang.

‘A mawi ber’ music video hi RDS Shot kutchhuak a ni a, Waves Records-a an record a ni a, music hi live veka record a nih avangin a hlu a, an thiam tih pawh a lang hle. C. Vanlalvuana’n thiam tak a lo sak tawh kha aw ngaihnobei leh ngaihthlak nuam takin Cindy hian a rawn tuaihnuma a nalh hle. Amah Cindy-i chuan, “A nalh ka ti a, a video pawh a ṭha ka ti. Hlaah chuan ka duh berte zinga mi a ni,” a ti.

Praise On hi nikum October-a zawh kha a ni a, Cindy hian music video-in a vawm zui har hle. A chhan a sawiah chuan a lehkha zir lai vang a ni. Class chawlh lai hunawlah Cindy hian a music video hmasa ber hi a buaipui a, a zawh a, TV-a a dah fel hnuah music video dang pawh a buaipui chho leh ṭan. Karleh khian recording an ṭan ang.