MYC chairman-in D&C Coaching Institute a hawng

Mizoram Youth Commission chairman Dr. Vanlalṭanpuia chuan nimin khan D&C Coaching Institute, Mc Donald Hill, Zarkawta mi chu a hawng. D&C Coaching Institute hi kum 2018 khan din a ni tawh a, tun ṭumah hian Zarkawta an Coaching Institute chei ṭhat chu an hawng.

Dr. Vanlalṭanpuia chuan, "MYC-in theihtawp chhuahin Mizo ṭhalaite intuaihriam dan tur a buaipui a, D&C Coaching a lo indinthar leh hi a lawmawm takzet," tiin a sawi a, Mizo ṭhalai a tam thei ang berin Coaching Institute hmang ṭangkai turin a sawm.

D&C Coaching Institute hi David LF-a din a ni a, ani hi Loyola College-ah MA English a zawh hnuin Oxford University Press-ah a inziak tling a, hun rei tak a thawk zui bawk. Kum 2018 khan Republic Veng Branch YMA puihnain Community Hall-ah coaching centre hi a ṭan a, Mizorama coaching centre langsar zinga mi a ni.

D&C Coaching Institute-ah hian English Grammar, Interview, Group Discussion, Writing Skills, Content Conceptualisation (text), Content Editing (text), Translation, Creative Writing, Essay Writing, Letter Writing, Spoken English leh Soft Skills te an zirtir. An student zingah sorkar hna hmu bakah IIM leh IIT bakah phai lam company-a lut thlengin an awm tawh a ni.