Billboard ; Bad Bunny 'Un Verano Sin Ti' -in kar sarih ro a rel ta

Billboard 200 chart-ah Bad Bunny 'Un Verano Sin Ti' bawkin ro a rel a, kar sarih (a zawn ni loin) lai he album hian chart a thunun tawh, Hot 100 chart lamah pawh kar hmasa lama roreltu Lizzo 'About Damn Time' bawkin ro a rel leh.

'Un Verano Sin Ti' hi Bad Bunny studio album palina niin May 6-a a tlangzarh daih tawh kha a ni a, Billboard 200 chart-ah hian kar 12 lai lang tawhin chuta ṭanga kar sarih lai chu pakhatna a ni tawh. Tunkar chart-ah hian SEVENTEEN 'SEVENTEEN 4th Album Repackage: Sector 17' chu top 10-a album tlangzarh thar lang zingah chuan a che ṭha bera, palina a ni a, Jack White-a album thar 'Entering Heaven Alive' chu pakuana a ni bawk.

Hot 100 chart lamah chuan hla thar han hit em em a awm lem loa, Lizzo 'About Damn Time' hi a zawnin kar hnih chhung pakhatna a ni ta a, chart-ah erawh kar 15 lai a lang tawh thung. Kumina hla lar tak mai Harry Styles 'As It Was' chu pahnihna niin kar hmasaa pathumna Kate Bush 'Running Up That Hill (A Deal With God)' chu pathumna a ni leh. Hot 100 top 5-te chu kar hmasa lama an dinhmun ngaiah an ding leh vek a ni.