Tom DeLonge chungchangah Mark Hoppus a ṭawng chhuak ta

Khawthlang media hrang hrangin Blink 182-ah Tom DeLonge a kir leh dawn niin an sawi nasa hle a, chumi chungchangah chuan thuchiang hriat tur rei tak a awm loh hnuah Mark Hoppus a ṭawng chhuak ta a, "Thuthar engmah sawi tur a awm lo. Thuchhuah siam engmah a awm lo," tiin a sawi.

Tunhnai lawk khan Tom DeLonge tlaktu Matt Skiba chuan pop punk band Blink 182-ah a la tel reng em tih a chian loh thu a sawi chhuak zeuh a, hemi hnu hian social media lamah Tom chu a let leh ta niin thu a darh nasa nghal hle.

Kum 2015-a kum 46 mi Tom DeLonge-a'n Blink 182 a chhuahsan hnu khan Alkaline Trio vocalist Matt Skiba hian kum 50 mi Mark Hoppus leh kum 46 mi Travis Barker-te chu tour puiin hemu hnu hian album pahnih- California (2016) leh Nine (2019)-te chu a tihchhuahpui zui leh a ni. Mahse kum 2020-a an tihchhuah single 'Quarantine'-ah erawh kha chuan Matt hi hmuh tur a awm lo.

Instagram lama Matt-a post pakhat, Blink chungchang lan lohnaa comment pakhat a chhannaah Matt chuan Blink 182-ah chuan a la tel reng em tih a chian loh thu hi a sawi a, Blink 182-a hun a hmang thei erawh a inchhuan thu a sawi tel bawk a ni.

Hemi chungchanga thu lengvak tam tak a awm hnuah Mark chu a Discord page-ah ṭawng chhuakin Tom chu an band-ah a kir loh thu a sawi a, "Thuthar engmah sawi tur a awm lo. Thuchhuah siam engmah a awm lo. Vawiin hian BLINK 182 chuan kum 30 a tling!" tih a post.