Gal Gadot Wonder Woman-a a hlawh a tlem

Wonder Woman film hian khawvel pumah USD mtd 573 zet a lalut tawh a, chutihlai chuan a changtu ber, Gal Gadot hlawh erawh USD nuai thum chauh a ni! Robert Downey Jr.-a’n Iron Man 2 a chan khan USD mtd 10 a hlawh thung! Tun ṭumah hian a hlawh tlem mai mai a niang, kan ti mai thei a, Batman v Superman: Dawn of Justice-ah khan USD nuai thum tho a hlawh a, hemi zat bawk hi Justice League-ah khan a hlawh.

A changtu bera film liana a vawi khat channa chauh a nih avangin a hlawh tlem a niang tia an sawi chu hmeichhia a nih avanga hlawh pe tlem anga ngaitute chuan a dik thei lo an ti. Superman film Man of Steel kha Henry Cavill tan film liana a changtu bera a chan vawi khatna a ni a, USD mtd 14 a hlawh thung! Mahse Gal Gadot hlawh hi a tlem ngawr ngawr chuang lo, a film chan, Wonder Woman hlawhtlin dan ang zelin pawisa a hmuh belh ve zel a ni.

Mipa pawh film liana vawi khat an channaah chuan an hlawh tlem ve tho titute ṭan chhan hi a dik ve viau tho. Captain America: The First Avenger-ah khan Chris Evans chuan USD nuai thum tho a hlawh a, Thor movie hmasa berah khan Chris Hemsworth chuan USD nuai hnih chauh a hlawh. Kum 2008-a Iron Man movie an tihchhuah hmasak berah Robert Downey Jr. chuan USD nuai nga a hlawh.

A hnua film an chan lehah chuan an hlawh hnem chho ta deuh. Iron Man 2-ah Robert Downey hian USD mtd 10 a hlawh tawh a, Avengers: Age of Ultron-ah khan Chris Evans pawn USD mtd 7 a hlawh ta. Wonder Woman 2-ah chuan Gal Gadot pawh hian a hlawh hnem ve deuh tawh ang chu.

A channa Wonder Woman chu hlawhtlin namenin a hlawhtling lo a tih theih ang. Sum tam tak a lalut a, a changtunu ber, Gal Gadot erawh chu chhe loin, chang thiam viau mah se, a hlawh tlem hle thung. Mi tam tak chuan hmeichhia a nih vang niin an ngai a, mi Ṭhenkhat chuan movie liana main role a chan vawi khatna a nih vang a ni an ti thung.