Glastonbury Festival-ah Peace sign hmangin world record siam tum

Sommerset, England bula Glastonbury Festival-ah a kalte chuan mihring din kual hmanga Peace sign lian ber siam an tum a, mi 15,000 chuang tel tura beisei an ni.

Peace sign mihring hmanga siam lian ber chu kum 2009-a New York-a mi kha a ni. New York-ah hian Ithaca Festival neih a ni a, hetah hian mi 5,814 te chu ding kualin Peace sign hi an siam a, mihring hmanga siamah chuan a la lian ber. He record hi Glastonbury Festival buatsaihtuten khum an tum.

Glastonbury Festival buatsaihtute chuan Peace Sign siam an tumna chhan chu khaw­vel hnena muanna leh hmangaihna thuchah theh­darh an duh vang tih an sawi. A buatsaihtute zinga mi, William Hawk chuan tunhnaia pawi­khawihna leh chhiat­na thleng chung­chang aṭangin, “Hetiang thil hi khawvelin a ma­mawh lo. Muanna leh hma­ngaihna rawn awm theihna chu a awlsam a, midang­te hnen­a muanna an neih theihna tur pek leh hmangaih a ni mai,” a ti.

Glastonbury Festival-a tel tur hian Sommerset-a Worthy farm hi mi nuai hnih velin an thleng tawh a, ticket zawng zawng an hralh zo. Ni thum awh a ni a, nimin, vawiin leh naktuk te hi Festival neih ni a ni. Foo Fighters, Radiohead, Ed Sheeran tih vel chu a che tur langsar zinga mi an ni.