Kimkima ft. G’nie 'Ka Ngai che' Darkar 24 chhungin Rs. 20,000 chuang lalut hman

Mizo application siam Darbu App chu mipuiin kan hmelhriatin kan hmang ṭangkai chho zel a, Mizor artist-te'n an album leh single thar tihchhuahna atan an hmang mek zel.

Kimkima leh G'nie pawhin an thawhdunna hla 'Ka Ngai Che' chu ni thum liam ta khan Darbu App-ah hian dahin Zofate'n kan hlut nghal hle tih a hriat a, an dahchhuah aṭanga darkar 24 chhung lekin he hla aṭang hian Rs 20,000 chuang an lalut hman a, leitu an la pung zel bawk.

Zofate hian Mizo zaithiamte kan ngaihlu chho zela, hla ṭha an tichhuak a nih phawt chuan manchawia ngaihthlak kan hreh lo tih a chiang. K Hminga pawhin 'SDO Dance' aṭang khan thla khat pawh a tlin hmain Rs nuai chuang a lalut tawh bawk a ni.

“Mipuiin Zaimite kan ngaihhlut zia kan hmuh hian kan lawm takzet a, kan thlen chin aṭang hian hma sawn zel kan tum,” tiin Darbu Team-te chuan an sawi a ni.

Darbu hian hla thar chauh a inthurbing lo a, Mizo tana rohlu, hla hlui, hmun danga hmuh tur awm tawh lote Darbu-ah hian an seng lut mek. Mizo Male Voice Hmasa ber - Thuchah Kengtute, Mizo Female Voice lar ṭhin - The Friends-te leh Khawvel ram pum a zaia rawngbawlna nei tawh Mizo Choir-te album kimchang takte pawh an dah chho zel a ni.