Record siamtu Katy Perry

Katy Perry hla chu RIAA chuan Diamond Song Award a hlan leh a, Katy label chuan Katy hian record a siam ta a ni tih an puang.

Katy Perry hla hit ‘Roar’ kha RIAA chuan Diamond Song Award a hlan a, Diamond Song Award hi copy maktaduai 10 hralh tling hnenah an hralh ṭhin. He chawimawina an hlan hnu hian Katy Perry label, Capitol Music Group chuan Katy hi zaithiam awm tawh leh awm mekte zinga Diamond Song Award pathum dawng thei awm chhun a ni a ti.

Music khawvelah chuan a hlawhtlinzia hi a turu a, Katy hla ‘Roar’ hi kum 2013-a a tihchhuah kha a ni a, a album ‘Prism’-a mi a ni. ‘Roar’ hla hi single-in kum 2013 August thla khan a tichhuak a, chart-ah pawh pakhatna a luah nasa hle. Kum 2013 aṭang khan he hla an hralh tawh zawng zawng, CD ang zawng te, streaming equivalent ang zawngtein, copy maktaduai 10 hralh tling ang a ni ta a ni.

He hla bakah hian ‘Dark Horse’ leh ‘Firework’ hlate aṭangin Katy hian Diamond a dawng tawh bawk. Hla pathum hmanga Diamond a dawn takah chuan zai­thiam awm tawhte zinga Diamond pathum dawng thei awm chhun a ni tiin Capitol chuan a sawi a, RIAA chairman Cary Sherman pawhin a rawn nemnghet. Hla mal, copy maktaduai 10 hralh tlin theih hi tun thlengin hla 14 chauh a la awm a, chung zingah chuan Katy Perry hla pathum ngawt a awm thei hi a namai lo hle.

‘Dark Horse’ hla pawh hi Prism album-a mi kha a ni a, Juicy J nena an sak a ni. December, 2013 khan single-in an tichhuak a, a hlawhtling hle. Sale pangngai leh track equivalent te nen he hla hi copy maktaduai 13.2 zet an hralh tawh a, kum 2014 chhung khan khawvela hla mala hralh ṭhat ber dawttu a ni. ‘Firework’ hla hi kum 2010-a album a tihchhuah ‘Teenage Dream’-a mi kha a ni a, single-in kum 2010 Ocotber thla khan a tichhuak.