NETFLIX-a film en hlawh ber Extraction

Netflix chuan an platform-a film en hlawh zual list an tichhuak a, Randeep Hooda leh Chris Hemsworth channa Extraction chuan en a hlawh ber. Extraction dawtah hian Birdbox chuan en a hlawh ber a, Spenser Confidential chu en hlawh pathumna a ni bawk.

Netflix hian list an tihchhuaha entu tam an chhut danah hian tlangzarh a nih aṭanga kar li chhunga entu tam dan an la a, chumi hnu lam chu an chhut zui lem lo. Hemi a nih avang hian hripui leng vanga khawvel hmun tam ber inkharkhip lai, April 24-a tlangzarh Extraction hi pakhatna a ni a, kar li chhung lekin Netflix kaltlanga entu hi maktaduai 99 lai an tling hman. Pirate version entu nen phei chuan entu hi hei ai hian an tam zawk fe dawn tih a chiang.

Khawvela film sum lalut tam ber Avengers: Endgame siamtu Russo brothers inrawlhna film a ni miau a, heti fakaua entu an tam chak pawh hi a mak lo hle. 

Extraction hi tlangzarh a nih hma aṭang tawha thawm nei lian a ni hrim hrim a, film critics lam pawhin an fak pangngai hle a, film hmuhnawm pangai huangah an dah tlangpui. May thla khan a chhun­zawmna siam turin Joe Russo an ruai leh niin report a awm bawk a ni.

Sandra Bullock channa  post-apocalyptic horror thriller film Bird Box, kum 2018-a tihchhuah chu en hlawh ber dawttu a ni. Bird Box hian kar li chhungin entu maktaduai 89 a nei hman a ni. Kumina tlangzarh tho, action comedy film hmuhnawm tak, Mark Wahlberg channa Spenser Confidential chu pathumna a ni a, kar li chhungin entu maktaduai 85 an awm hman bawk.

Nikum kum tawp dawna tlangzarh, Ryan Reynolds leh film star lar rual inlanna, film siamna atana $mtd 150 lai an sen 6 Under­ground chuan kar li chhungin entu maktaduai 83 a nei hman a, en hlawh palina a ni. Murder Mystery chu pangana niin kar li chhungin entu maktaduai 73 an awm a ni.

•    Netflix hian entu tam list hi an tihchhuah vawi khatna a ni.

•    Kar li chhunga entu tam dan list aṭangin list hi an siam.

•    Netflix hian Bloomberg kaltlangin list hi an tichhuak.

•    List-ah hian movie chiah an tichhuak a, TV series an tarlang tel rih lo.

Netflix film kar li chhunga entu tam top 10:-

1    Extraction     99 million

2    Bird Box     89 million

3    Spenser Confidential     85 million

4    6 Underground     83 million

5    Murder Mystery     73 million

6    The Irishman     64 million

7    Triple Frontier     63 million

8    The Wrong Missy     59 million

9    The Platform     56 million

10    The Perfect Date     48 million