Mizo rocker F Sanglura album thar a hnai

Mizo rocker F Sanglura chuan kumin chhung ngei hian rock hla hlang awmna album tihchhuah a tum.

F Sanglura hian a album thar tur hi a peihfel ṭep tawh a, hla pahnih vel buaipui tur a la nei a, kumin kum tawp lamah hi chuan a tlangzarh hman a inbeisei. A album thar tur title hi 'Ka Tum Nge Ruh Saruh' tih a ni dawn a, single-in eng emaw zat tunhnaiah a tichhuak tawh bawk.

Zonun Recording Studio-ah a vai hian recording a ti vek a, hla pahnih a la peihfel loh pawh hi a musician-te zingah chhiat tawk an awm vang a ni. Pakhat chu hmanni lawka boral Siama kha a ni a, ani nen khan a album thar tur hi an buaipui dun nasa hle.

F Sanglura chuan, "Live music veka recording tih a ni dawn a. Rock music hi ka tui a, record neih pawh ka duh. Mizo rimawi hi chi hrang hrang awm se ka duh a ni," tiin a album thar tur chungchang hi a sawi.

Hmanni lawk khan a single video thar 'Ṭingṭang Rimawi' a tichhuak a, he hla ngaithla tawhte chuan a album thar tur kalhmang an hre thei awm e.