Mipa naupang huaisen Hulk leh Captain America-te'n an fak

Tunlai social media-a lar mek, mipa naupang pakhat Bridger-a'n a farnu ui lak aṭanga a chhanchhuah chungchang post chuan lawm a hlawh hle a, Avengers star pahnih  Mark Ruffalo leh Chris Evans-te chuan fakawm an tih thuin an chhang let hial.

Bridger ni Nikki Walker chuan social media-ah a vahpa thiltih chungchang leh a thlalak hi a tarlang a, real life superhero an awm a ni tih lantirna turin Avengers star ṭhenkhat chu a post-ah hian a tag bawk a ni. Mark Ruffalo chuan chhang letin,"Mahni aia midang dah hmasa ṭhinte chu hero tak tak an nih thu leh mi remhre ber an ni," tia sawiin a huaisenna chu a zah thu a sawi. Huaisenna tak tak chu midang hnuaichhiah emaw midang sual emaw chak tak anga khawsak emaw a ni lo. Huaisenna tak tak chu thildik tih tur hriaa mahni tana pawi tur pawh ni mah se tih tho hi a ni, tiin a sawi bawk.

Chris Evans pawhin Bridger pual hian video message a thawn a, hero tak tak a nih thu leh a thiltih chu huaisen a tih thu leh a farnu chu amah avang chuan a vannei tih a sawi. Official Captain America shield thawn a tiam bawk a ni.

Bridger hian a farnu chu uiin a bei tur lakah a chhan a, ui chuan a hmaiah vawi eng emaw zat a seh hman nghe nghe. Chumi hnu chuan a farnu chu a banah kaiin hmun him lamah a tlanpui ta a ni. A hnua thil thleng chungchang an zawhnaah chuan,"Tu emaw a thi dawn a nih chuan keimah hi thi zawk ngei turah ka inngai," tia a sawi chuan fak a hlawh phah zual hle.