Fbb Colors Femina Miss India Manushi Chhillar ; Top 15-ah Rody a lang
Femina Miss India edition 54-na final hi Yash Ray Studios, Mumbai-ah neih a ni a, tun ṭumah hian contestant 30 an awm a, chung zingah chuan Haryana nula, Manushi Chhillar chu Miss India atana thlan a ni.
Sana Dua, Jammu & Kashmir chu first runner-up a ni a, second runner-up hi Bihar nula, Priyanka Kumari a ni. Sana Dua hi Femina Miss India Earth a ni a, Priyanka Kumari hi Femina Miss India Grand a ni.
Manushi nu leh pate hi doctor ve ve an ni a, St. Thomas School, Delhi-ah zir ṭhinin, Sonepat-a Bhagat Phool Singh Government Medical College-ah a zir leh a ni. Lehkha thiam thei tak a ni a, Class XII a nih khan English-ah CBSE all India topper a ni a, Class X pawh kha an school-a tiṭha ber a ni. Manushi ngaih pawimawh tak pakhat chu India ram pum hriselna atana thianghlimna pawimawhzia hi a ni a, a bikin hmeichhia bikah hriselna atana thianghlimna inzirtir hi thil tihmakmawh niin a ngai.
Top 15-ah Audrey D’Silva, Goa; Maira Choudhary, Delhi; Navpreet Kaur, Punjab; Swati Mupala, Karnataka; Mannat Singh, Kerala; Triveni Burman, Assam; Rody H. Vanlalhriatpuii, Mizoram; Licha Thosum, Arunachal Pradesh; Aditi Hundia, Rajasthan; Anukriti Gusain, Uttarkhand; Shefali Sood, Uttar Pradesh; Aishwarya Devan, Maharashtra; Priyanka Kumari, Bihar; Sana Dua, Jammu & Kashmir leh Manushi Chhillar, Haryana te an tling. Top 6-ah Maharashtra, Uttar Pradesh, Uttarkhand, Haryana, Jammu & Kashmir leh Bihar te an tling.
Tun ṭum Miss India-ah hian contestant te tan Neha Dhupia, Waluscha De Sousa, Dipannita Sharma leh Parvathy Omanakuttan te chu mentor an ni a, judge-ah hian Miss World 2016 Stephanie Del Valle a ṭhu a, ani bakah hian Arjun Rampal, Bipasha Basu, Manish Malhotra, Abhishek Kapoor, Vidyut Jammwal leh Ileana D’Cruz te pawh judge zingah hian an tel.
Show hi Karan Johar leh Riteish Deshmukh ten an host a; Sonu Nigam, Alia Bhatt, Sushant Singh Rajput leh Ranbir Kapoor te stage-ah an perform. Miss India grand finale hi July 9 chawhnu dar 1 khian Colors-ah tihchhuah a ni ang.
Pathianni zan khan Fbb Colors Femina Miss India chu thlan a ni ta a, Haryana nula, Manushi Chhillar chu Miss India atana thlan a ni a, ani hian Miss World-ah India ai a awh ang. Miss India Mizoram, Rody H. Vanlalhriatpuii chu top 15-ah a lang pha.
Top 15-ah Rody
Miss India inelnaa Mizoramin nula kan thehchhuah, Rody H. Vanlalhriatpuii hi a neu lo berte zinga mi a ni a, Top 15-ah a lang pha. Top 15 aṭang hian Top 10 thlang chhuak tawh loin Top 6 thlan nghal a ni. Lawngtlai nula Rody-i hian Sub Contest-ah Jio Miss Popular leh Miss Talented a lak bakah khan Body Beautiful-ah Top 9-ah a lang pha a, Miss Active-ah Top 5-ah a tling bawk.
Rody-i hian Instagram aṭangin a lawmzia a puang chhuak a, “Ka phu loh malsawmna leh duhsakna Mizoram mipuite hnen aṭanga ka dawn hi, engtikah mah ka theihnghilh tawh lo ang. In chungah leh Pathian chungah lawmthu awm mawlh rawh se,” a ti.
Vanglaini palaiin a biaknaah Rody chuan, "Ka thlen chinah ka lungawi tâwk em em. Mizo mipuite min ṭawiawmna leh min thlawpna zawng zawngah ka lawm tak meuh meuh a ni. Mizo mipuite avang liau liauin sub title ka lak theih phah a ni. Ka lawm lutuk a, ka lawmzia ka sawi seng lo," a ti.
"Hming lama lawmthu sawi duhna ka nei. Traditional costume min buaipuisaktu Hannah Khiangte, Rini Hlondo, Valerie Hauhnar, Miss Mizoram Organising Committee, Mumbai-a Mizote awm zawng zawng, Maria leh Abigail te. Theihtawpin min buaipui a, puih ka ngaihnaah min pui char char a, an chungah ka lawm tak meuh meuh a ni," a ti. Rody hi kar leh khian a rawn haw ang.