Transformers 5-in a hmaa mite a tluk lo
Box office lama sum lakluh dan thar tarlanah chuan Transformers film pangana, The Last Knight chu kar tawp chhunga North America-a sum lalut hnem ber a ni nachungin Transformers film lo chhuak tawhte erawh a tluk lo.
Transformers: The Last Knights film hian chawlhkar tawp ni thum chhung khan USD mtd 45.3 a lalut a, Nilaini aṭanga tihchhuah a ni a, Nilaini aṭanga sum a lakluhte nen chuan USD mtd 69.1 a lalut. Transformers film tihchhuah tawh hoah chuan opening week-a sum lalut tlem ber a ni. Dark of the Moon khan opening week-ah USD mtd 97.9 a lalut a, Age of Extinction khan USD mtd 100 a lalut. Revenge of the Fallen kha opening week-a sum lalut hnem ber a ni a, USD mtd 109 a lalut a, Transformers film hmasa ber khan USD mtd 70.5 a lalut.
North America-ah che ṭha lo mah se, ram dangah erawh chuan a che ṭha viau a, The Last Knight film hian China-ah ringawt USD mtd 123.4 a thawk chhuak a, ram dang 41 te nen, North America pawn aṭanga sum a hai luh zawng zawng hi USD mtd 196.2 a ni. He movie siam nana an sum senso hi USD mtd 217 a ni a, chawlhkar khatnaah a hmu tling nghal thei a, a hlawhtling viau tho mai.
Cars 3 film chu pahnihnaah awmin USD mtd 25.2 a hmu chhuak a, khawvel pumah he film hian USD mtd 141.3 zet a thawk chhuak tawh. Wonder Woman film chu pathumnaah a la ṭhu thei a, USD mtd 25.2 puanhnuai belhin, khawvel pumah USD mtd 652.9 a lalut tling ta.
Box office movie
“Transformers: The Last Knight” - $45.3 million
“Cars 3” - $25.2 million
“Wonder Woman” - $25.2 million
“47 Meters Down” - $ 7.4 million
“All Eyez on Me” - $5.85 million
“The Mummy” - $5.8 million
“Pirates of the Caribbean: Dead Men Tell No Tales” - $5.2 million
“Rough Night” - $4.7 million
“Captain Underpants: The First Epic Movie” - $4.3 million
“Guardians of the Galaxy Vol. 2” - $3 million