Honda BigWing Ṭhazual Gospel ; Jerry Lalrinawma hun a thleng ta

Honda BigWing Ṭhazual Gospel chart-ah Mizo Idol Jerry Lalrinawma 'Thlarauvin min hruai la' chu pakhatna a ni.

'Thlarauvin min hruai la' hi hla thar a ni hran loa, tunhma deuh khan Hmingtea pawhin thiam takin a lo sa tawh ṭhin. Mangheta phuah niin Jerry hian a rawn thar thawh leh a, a sa mawiin music a 'class' bawk a, a hla thu a ṭha bawk nen, a rawn thar thawh fuh viau. YouTube lamah pawh a dah chhuah aṭangin thla khat vel chiah a la ral tihah thlirtu nuai sarih chuang fe a nei tawh! Darbu lamah pawh he hla hi pawisa tlemte chawiin a lei theih reng bawk.

Pahnihna chu chart hmasa lama palina Bethsy Lalrinsangi ft Rindika Zadeng 'Vanram ngaihtuah hian min tilawm a' tih kha a ni a, anni pahnih hian hma an sawn chak hle. Pathumna chu Lalthansangi 'Ram ropui tak lo thleng tur' tih kha a ni ve thung.

Hlimhlimi 'Ka hlan a che' leh One in Christ 'Nang chauh ka bei ang' chu top 5-ah lang bawkin Fall Profane, Thawhlehnaniropuia, Benjamin & Isaac leh The Illusionist-te pawh top 10-ah an lang a ni.