Predator franchise film pangana 'PREY' a chhuak ta

Kum 1987-ah daih tawh khan Arnold Schwarzenegger channa film lar tak 'Predator' kha tihchhuah a ni tawh a, a lar rem rem bawka Zofate zingah pawh Predator film hi a mikhual lo. Chutichuan, Zirtawpni liam ta khan Hulu streaming platform-ah Predator film kalzel, a film pangana Prey chu tichhuah a ni a, film review-tute mit a tlungin Predator film hmasa bera changtur zinga mi Jesse Ventura pawhin a fak hle.

Prey hi Predator franchise film pangana mah nise a film hmasa pali ho thlen hmaa thil thleng anga chan a ni a, CW series lar 'Roswell, New Mexico'-a achangtunu Amber Midthunder chu changin critics lamin Midthunder chevel hi an fak hle nghe nghe.

San Diego Comic-Con-ah khan a vawi khatna atan he film hi chhuah a ni tawh a, Zirtawpni liam ta khan Hulu lamah pek chhuah a ni leh ta a ni. Kum 1719 vela America rama Comanche tribe chunga thil thleng anga chan niin, Predator landan hmelhmang pawh film hmasa lama kan hmuh tawh dan nen chuan a danglam deuh.

Rotten Tomatoes lamah critics 168 laiin review-in rarting pawh a hmu ṭha a, 7.7/10 lai a hmu. Rotten Tomatoes leh Metacritic website-a Predator film rating hmu ṭha ber a ni hial!

Amber Midthunder bakah hian Dakota Beavers, Michelle Thrush, Stormee Kipp, Julian Black Antelope leh Dane DiLiegro-te chu he film-ah hian an chang a, achangtute chevel hian fak a hlawh bakah visual effects leh cinematography pawhin fak a hlawh hle a ni.

Predator film hmasa bera Blain Cooper lema chang Jesse Ventura chuan Twitter lamah 'Prey' chu a fak hle a, "Film ropui tak a ni. Amber Midthunder (amah a mention a), i thisen a chhuak hman meuh lo a nih kha. Predator chhungkuaah ka lo lawm a che. Danny TRS, hetiang film ropui, creative tak hmangchang hre taka i siam avang hian lawmthu ka hrilh a che," tiin a tweet hial.

Predator franchise-ah hian film panga a awm tawh bakah Alien nena an intawnna film pahnih siam a ni tawh a ni.