Michael M. Sailo Kan thinlai hnemtu a la ni

ICFAI Ṭhazual Lengzem chart tih­chhuah tharah hian Michael M. Sailo hla record hnuhnung ber, ‘Thinlai hnemtu’ chu pakhatnaah a awm a, Mathlenga ‘Zawlkhaw dingdi’ pawhin a chelh ding zo lo. Mizo music industry-a thawhhlawk Michael M. Sailo hi Mizo mipuite hian kan la duh tih a hriat a, a hun lo takah min kalsan ta nachungin, kan thinlungah chuan a la châm reng a ni.

‘Thinlai hnemtu’ hla hi Michael M. Sailo ngei a zaina music video hnuhnung ber a ni a, April thla khan tlangzarh a ni. A thih hma khan recording an ti hman a, video erawh hmachhawpa an neih mek laiin a liamsan ta a ni. May 29 aṭang khan Ṭhazual chart-ah hian lang ṭanin, a vawi khat lannaah palinaah bul a ṭan nghal thei. June 12-a chart tih­chhuah lehah kha chuan pahnihna thleng chhoin, chart-a a ṭum thum lannaah pakhatna a luah thei a ni. Chart-a ṭum thum lannaa pakhatna luah thei hla hi tlem te chauh a la awm a, DJI hla, Michael M Sailo nena an sak ‘Liam mai rawh’ leh Essy hla ‘Hey’ te chauh kha an la ni.

Mathlenga hla ‘Zawlkhaw dingdi’ chu pakhatna aṭangin pahnihnaah a chhuk a, Manuna hla ‘Duhaisam’ chu palina aṭangin pathumnaah a rawn chho. Lilzo hla thar ‘Ka pa’ chu palina a rawn kai tawh a, Marshall FK leh Ruatfeli te sak ‘Fahrah nun’ chu panganaah kan hmu bawk.

Top 10 aṭangin Casey’s Secret hla ‘Duhaisam’ chu a chhuak a, Zorinzuali Khiangte leh 135 (a.k.a Ace or Michael M. Sailo) te sak dun ‘A rem tawh lo’ tih chu pasarihnaah a rawn lang thar bawk a, Michael M. Sailo lanna ngei mai music video hi mi tam tak chuan thinlung tithartu a tling ngei ang.

ICFAI Ṭhazual Lengzem
1 Michael M Sailo - Thinlai Hnemtu
2 Mathlenga - Zawlkhaw Dingdi
3 Manuna - Duhaisam
4 Lilzo - Ka pa
5 Marshall FK ft Ruatfeli - Fahrah nun
6 C Sanga - Lungrunpui
7 Zorinzuali Khiangte feat 135 - Ka ngaidam che
8 Intonation - Tlai khat
9 Aziri - Engvangin nge
10 Pantei - Tawnmang