Tubelight-in beisei a pha lo
Salman Khan channa film Tubelight chuan beisei a pha chiah lo a, chutihrual chuan sum erawh a hmu hnem viau tho.
India leh China indo chanchin chhehvela film siam, Salman Khan channa, Tubelight hi India rama theatre 4,400-ah leh US-a theatre 300 velah chhuah a ni. India bikah Zirtawpni khan Rs. vbch 21.15 a hmu a, Inrinni khan hetiang zat vel bawk hmuin, Pathianni khan vbch 1 velin a hmu hnem. India pawnah chuan Zirtawpni aṭanga Pathianni chhung khan Rs. mtd 3.25 vel a hmu.
Beisei a pha lo deuh tih chauh a ni a, kumin chhunga Indian film chhuakah chuan sum lalut hnem pasarihna a ni pha tho. Sum lakluh hnema a tluk loh zingah Baahubali 2, Kaabil leh Raees te an tel. Tihchhuah nia sum lakluh hnemah pahnihna a ni pha tho a, a aia hmu ṭha chu Baahubali 2 kha a ni. Tihchhuah a nih aṭanga a ni hnihnaa sum lakluh hnemah Raees a tluk lo.
Salman Khan channa film hrim hrimah chuan opening weekend-a sum lalut tlem ber a ni. Kum 2016-a Sultan khan opening weekend-ah Rs. vbch 105.53 a lalut a, kum 2011-a Bodyguard khan Rs. vbch 88.75 a lalut. Tubelight hian Rs. vbch 64 vel kar tawp chhung khan a lalut a ni.