Turkey-ah Darwin-a theory zir tawh dawn lo

Tuna thil nung, leia awmte hi nunna nei mawl zawkte aṭanga lo piang danglam kan ni tih ngaihdan lo chhuahna, Darwin-a theory chu Turkey chuan school-ah te zirtir an ni tawh dawn lo tih a puang chhuak.

Turkey sorkar chuan school zirlaibua ‘Beginning of Life and Evolution’ chapter awm ṭhin chu a tibo tawh dawn a, school official-te chuan he chapter hi inhnialna nasa tak awmtir thei a ni a, chubakah chuan hriat thiam a har a ni an ti.

Charles Darwin-a theory lar, evolution hi Kristiante leh Muslim zinga creationist te chuan an hnawl. Heng mite hian Bible leh Koran-a Pathian­in lei leh van leh thil awmte a siam dan ang chiah chiah an ring a, Bible leh Koran-ah te hian khawvel hi ni ruk chhunga siam zawh ve ve a ni. Kristian Creationist te chuan Bible-a thil siam ‘ni’ a sawi hi ni khat tak tak niin an ngai a, Muslim Creationist te erawh chuan ni khat chiah chiah hi ni loin, hun rei tak pawh kâwk theiin an ngai.

Charles Darwin hi English naturalist a ni a, kum 1809-ah piangin kum 1882 khan a thi. Leilung awm dan leh nungchate pianhmang zirin a zin kual nasa hle a, kum 1859 khan ‘On the Origin of Species’ a tichhuak a, hei hian tun thlengin huhang a nei lian hle. Evolution chung­changah Mizotena kan hriat fuh tawk loh ṭhin chu mihringte hi zawng thlah anga sawi niin kan ngai ṭhin a, zawng thlah ni loin, zawngte nena thlahtu thuhmun tia sawi zawk tur a ni awm e.

US-a school tam takah pawh Evolution hian tun thlengin chai a la hlawh hle. State ṭhenkhatah chuan ‘Evolution’ tih ṭawngkam hman an phal lo a, ‘Change over time’ tiin an school zirlaibuah an ziak. Georgia state-a zirlaibuah chuan board of education thuchhuah tarlan a ni a, evolution hi ngaihdan ve mai a ni a, fact a ni lo tih tarlangin, rilru zau tak nen, uluk tak leh critical taka zir tur a nih thu tarlan a ni.