HELP concert zaninah

MZI-in Mizoram hmun hrang hranga leilung chhiatna thleng tuartute ṭanpui nan zanin hian concert a buatsaih dawn a, he concert-ah hian tunlai zaithiam lar leh band hrang hrangte an zai ang.

Help-Rock for Mizoram Concert tia vuah hi Vanapa Hall-a neih tur a ni a, hun khatna hi chawhnu dar 2 aṭanga ṭan a ni ang. Bul ṭan nan Tribal Power-a an frontman OPA’n thutawi a sawi ang a, chumi zawhah chuan band hrang hrang 30 lai an zai dawn. Charity concert atan hian Active Sound chuan a thlawn vekin sound an hung chhuak a, P&E hotuten current a awm ṭhat nan hma an la bawk. Charity concert tur a nih hriain Art & Culture chuan Vanapa Hall hi a thlawnin an hmantir.

Concert-na hmunah hian en man ni loin bâwm dawh a ni ang a, bâwma pawisa awm zawng zawngte hi tuilian leh leimin leh tuarte ṭanpui an ni ang. Nasa lehzuala luang chhuak duh tan Gold Card siam a ni bawk.

Zan lam hun a awm dawn bawk a, dar 7 aṭanga ṭan tur a ni. Concert Committee chairman, Vanlalrema Vantawl chuan thutawi a sawi ang a, zan lamah hian senior band ho kan hmu dawn. Dreamhunter, Tribal Power, Zonun Band, Forever Young te che tur zinga mi an ni. Anni band zawhah hian Zosaps ho an inlan bawk ang.