Bollywood veteran Rishi Kapoor a thi

Bollywood veteran actor Rishi Kapoor chu nimin khan kum 67 mi niin, thling cancer vangin Mumbai-ah a thi.

Rishi Kapoor hi kum 2018 khan a thling a cancer tih hriatchhuah a ni a, New York lamah enkawl nghal a ni. Kum khat chhung lai hlawhtling taka enkawl a nih hnuah nikum September 26 khan India-ah a rawn kir leh a ni. 

Kumin February khan ṭum hnih damdawi-in panpui a ni a, New Delhi leh Mumbai damdawi-inah dahluh niin, dam takin a chhuak leh a, social media kaltlangin a fan-te leh a chhungte hnenah pawh lawmthu a la sawi. Mahse nimin piah, Irfan Khan thih ni khan thawk lamah harsatna a neih avangin  Sir H. N. Reliance Foundation Hospital, Mumbai-ah kalpui a ni a, nimin khan a thi ta a ni. Kapoor hian a nupui leh a fate pahnih a kalsan.

New York-a enkawl a nih la hian Ambani, Shah Rukh leh Gauri Khan, Alia Bhatt leh Deepika Padukone-te pawhin an tlawh nghe nghe. 

A thi tih puan a nih velah khan uitu pawh a ngah hle a, politician leh lemchan thiam tam takin an ui thu an sawi a ni.

A lemchan thiam vang hian chawimawina pawh a dawng hnem hle a, Filmfare award phei chu pali lai a la hman.

Kum thum mi lek a nih lai aṭangin Rishi Kapoor hian film a chang ṭan a, a pa Raj Kapoor film Shree 420-ah a inlan a ni.

A pa film tho, 1970-a tih­chhuah  Mera Naam Joker-ah inlan lehin heta ṭang hian mi hriat a hlawh chho ṭan a, 1973-a Bobby a chan hnu phei chuan hriat a hlawh zual hle. Bobby hi a hunlai khan a lar vet vet hle a, Kapoor hian  Filmfare Best Actor Award-te pawh a dawn phah hial.

Kum 1973 leh 2000 inkar khan 'solo lead hero' film 51 laiah a chang a, mahse 11 vel chiah a hit thung. 

Kum 2000 hnu lamah hi chuan supporting actor angin a chang nasa thung a, nikum pawh khan a channa film pahnih lai tlangzarh a la ni bawk.

Rishi Kapoor hi film 90 chuangah a damchhung khan a inlan hman a ni.

Rishi Kapoor nupui  Neetu Singh hi lemchan thiam tho a ni a, an nupa hian film 15-ah an chang dun a ni. Fa pahnih designer Riddhima Kapoor Sahani leh lemchan thiam lar tak  Ranbir Kapoor-te an nei a ni.

Karisma Kapoor leh Kareena Kapoor-te patea a ni a, a pa Raj Kapoor pawh kha lemchan thiam tho a ni bawk. A pu  Prithviraj Kapoor pawh lemchan thiam niin, a unaute- Randhir Kapoor leh Rajiv Kapoor, a nu unaute- Prem Nath, Rajendra Nath, Narendra Nath leh Prem Chopra-te bakah a pa unau Kapoor leh Shammi Kapoor-te pawh lemchan thiam lar an ni vek.