Zaninah 1st Round zan khatna ; Zonet Empai-ah a thlawnin a en theih dawn

Mizo Idol Season 7 audition result chu August 7 khan puanzar zawh fel a ni tawh a, tunah chuan 1st Round lam a hawi theih tawh e. Zanin aṭangin 1st Round ṭan a ni tawh dawn a, Zonet Zawlbuk leh Zonet Empai-ah zan dar 8-ah live-in pek chhuah a ni dawn.

Audition round paltlang hi mi 124 an awm a, chung mite chuan zanin aṭang hian inelna an ṭan dawn a ni. 1st Round-ah hi chuan guitar nen an zai thei tawh dawn a, zanin aṭanga Zirtawpni zan thlengin 1st Round hi neih a ni dawn. Audition round paltlangte inlan zan tur list chu Mizo Idol Instagram page lamah tarlan a ni tawh.

Mizo Idol 2022 audition hi July 20 zan aṭang khan ṭan ni tawhin Champhai District-ah Elimination round neih hmasak ber a ni. Contestant 400 chuang awmin chung zinga a ṭha zual 124 thlan chhuahte chu zanin aṭang hian an inel ṭan leh tawh dawn a, mit leh beng a tlai dawn tih a chiang.

Mizo Idol Season 7-a pakhatna hian Rs Nuai hnih leh Yamaha Aerox scooter a dawng dawn a, pahnihna chuan Rs Nuai khat a dawng anga, pathumnain Rs 70,000 a dawng thung ang.

August 14 hian 1st Round result puan a ni dawn a, mi 50 thlan chhuah tur a ni dawn. September thla zawh hmain Mizo Idol Season 7 hi a hmawr bawk hman an tum.

Judge leh Host turte
Zanin aṭang hian Mizo Idol Season 7 official Judge-te an ṭhu tawh dawn. Season danga kan hmelhriat tawhte tho an ni dawn. Rinzauva, Robin-a leh Vari Varte te chu endiktu tur an ni leh dawn a, tute nge an nih Zofate'n kan hre tlang bawka, an chanchin sawi tam a ngai awm lo e.

Host pawh an ṭha dawn a, an hmuhnawmin an zei leh dawn. Tunlaia Zoram chhunga programme hrang hrang host tura sawm hlawh ber pahnih Zonuni Pachuau leh Angelina VL Hriatpuii te an ni dawn.

Zonet Zawlbuk leh Zonet Empai-ah zan dar 8-ah live-in pek chhuah a ni dawn