Siampuii Ralte-in 'Ngaihzual nang nen' tharthawh leh dawn

Mizo lengzem hla sa ṭhin zinga tunlaia lawm leh sawm hlawh ber pawl Siampuii Ralte chuan 'Ngaihzual nang nen' a rawn thar thawh leh dawn e. Zirtawpni zan aṭangin a YouTube channel-ah hmeh chhuah theihin a awm ang.

'Ngaihzual nang nen' hla hi chu mi tam tak chuan kan hre sa tawhin a rinawm a, a hla thupui chhiar ringawt pawh hian ṭhenkhat lung a tihlen ngei a rinawm. Ellis Saidenga hla phuah hi kum tam tak liam tawhah khan hranghlui zai thiam fam ta C. Lalrinmawia khan thiam takin a lo sa tawh ṭhin a, Zoram dung leh vangah he hla hi a sa lar viau. Chumi hnuah chuan zaithiam eng emaw zatin 'cover' leh tawhin Siampuii Ralte pawh hian a rawn thar thawh ve leh dawn a ni.

Siampuii hian lungkuai takin a rawn sa dawn a, ngaithlak a hahdam dap dap viau dawn.Recording a fiah felfai ṭhain thiamna a sang tawh bawk a, mi tam tak chuan kan hmet chhuak leh sek dawn tih a chiang viau mai.

MDM lamah a register fel tawh a, Zirtawpni zanah hian a YouTube channel lamah duh hun huna hmeh chhuah theihin a dah chhuak dawn.

Music leh recording chu Tluanga Hnamte, Westend Studio kut chhuak a ni a, videographer chu Zuala.langel a ni thung.