'Bullet Train' umphatu an awm lo

Film star lar rual- Brad Pitt, Joey King, Aaron Taylor-Johnson, Brian Tyree Henry, Andrew Koji, Hiroyuki Sanada, Michael Shannon, Benito A Martínez Ocasio leh Sandra Bullock-te fuankhawmna action comedy film 'Bullet Train' chu August 5 khan tlangzarh a ni ta a, North America Box Office-ah ro a rel nghal.

Kar tawp liam ta chhung khan he film hi theatre 4,357-ah tihchhuah a ni a, $30,030,156 lalutin sum lalut tam ber a ni. $maktaduai 90 vel senga an siam film hian ram hrang hrang Box Office aṭanga a sum hmuh tawh zat belhkhawm chu $mtd 65.1 vel a ni a, an budget hi chu an hmu let thuai dawn niin a lang.

He film hi critics lamin an fak angreng a, Rotten Tomatoes lamah erawh rating an pe sang vak hlawm lo aniang, mi 232-in an review aṭangin rating 5.6/10 a hmu.

Kar hmasa lama pakhatna 'DC League of Super-Pet' chu pahnihna ni thungin 'Nope' chu pathumna a ni ve bawk. Top 10-ah film thar dang lang pakhat a awm ve bawk a, chu chu 'Easter Sunday' niin pariatna a ni.

Top Gun 2-in Titanic US tualchhungah a thlawh pel
'Top Gun: Maverick' chuan North America Box Office-ah $663,542,869 hmu chhuak tawhin North America Box Office bikah chuan 'Titanic' aiin sum a hmu chhuak tam tawh zawk.

Kum 1997-a tlangzarh 'Titanic' khan US tualchhung Box Office aṭangin $mtd 659 hmu chhuakin 'Top Gun: Maverick' hian chu chu kar hmasa khan a khum a ni. Khawvel pum huap ang zawng erawh chuan 'Top Gun:

Maverick' hian a la um pha lo hle a, 'Titanic' hian $2,187,535,296 a hmuh chhuah tawh laiin 'Top Gun: Maverick' erawh hi chuan $1,353,542,869 a hmu chhuak tawh thung a ni.