Slipknot: Corey Taylor-in guitar 13 a lilam Solo project buaipui tum Jim Root

Slipknot leh Stone Sour frontman Corey Taylor chuan a hming sign chuanna guitar 13 chu eBay kaltlangin a lilam a, hemi aṭanga a sum hmuhchhuah zawng zawng hi Covid-19 tuarte chhawmdawlna atan a pe dawn.

Thawhṭanni aṭang khan guitar hi a lilam ṭan tawh a, May 7 thleng lilam a ni dawn. Heng guitar-te hi collect niin, electric leh acoustic guitar-te a ni hlawm a, company hrang hrang niin Fender leh Gibson-te pawh a tel. Ibanez bass guitar pakhat a tel bawk.

Corey Taylor guitar lilam zingah hian  Dave Grohl signature model,  gold metallic Gibson Memphis Dave Grohl DG-335 pawh a tel. He guitar hi 400 chiah siam a ni nghe nghe.

A guitar a lilam thu hi Instagram-ah tarlangin case leh certificate of authenticity awm vek a nih thu a sawi.

Taylor chuan a sum hmuhchhuahte chu Direct Relief-ah a pe dawn tih sawiin, Direct Relief chu personal protective equipment pe chhuaktu leh healthcare worker-te mamawh petu an nih thu a sawi a ni.

Slipknot guitarist Jim Root chuan solo project a buaipui dawn thu sawiin, mahni inkhung hran hun chu idea thar neihna atana hman a tum thu a sawi a, a rilru pawh a seng nasa hle.

"Mi tam takin solo project chungchang min zawt fo ṭhin. Tunah chuan hunawl ka ngah ta deuh bawk a, Slipknot khawvela lut lo tur eng eng emaw chu ka ziak tawh a ni. Chhungkua ka din lo a, nupui pawh ka nei lo, chung avang chuan eng emaw ka buaipui ve a ngai," tiin Loudwire-in an kawmnaah a sawi a ni.

Slipknot hi kum hnih thum vel chu band angin an reh rih deuh mai nia sawi thawm a awm. Corey hian Stone Sour lama hun hman tam a duh deuh a, We Are Not Your Kind tour an zawh hunah chuan project dang an buaipui hlawm mai thei.

Loudwire-in an kawmnaah hian Jim Root chuan Slipknot chu a ngaih pawimawh thu leh a ngaih pawimawh reng dawn thu a sawi a, kawng dangah an peng zuai dawn hlawm niin lang mah se kehdarh lam erawh an sawi lo.