Kendall leh Kylie Thupha an chawi a, an kawr siam an la kir vek

Jenner te unau t-shirt tihchhuah hi Nortorius B.I.G., Tupac Shakur leh Ozzy Osbourne-a fan te chuan an sawisel nasain, Notorius B.I.G.-a nu, Voletta Wallace phei chuan mimal takin a sawisel nghe nghe. Jenner te unau chuan Twitter kaltlangin thupha an chawi nghal. “Heng design te hi uluk taka kan ngaihtuah hmasak a ni a, midang tilungawi lo leh tithinrim tur zawnga tih a ni lo a, an chhungte, a bikin zaithiam kan hmante tihlungawi loh phei chu kan tum miah lo. An music hi kan ngainain kan ngaisang a, icon an nihna zah lo zawnga ti kan ni lo. Retail-a zawrh chhuah t-shirt te pawh kan ko kir leh vek a, an hmel lanna pawh hi kan hru reh vek ang,” an ti.

Hetiang hi ni mah se, Nororius B.I.G.-a estate chuan an thupha chawina hi a pawm duh lo thung. “Jenner-ten thupha an chawi leh, kan phalna leh hriatpuina tel loa keimahni kaihhnawih thla an lo tihchhuahna kawrte an ko let leh hi ṭha kan tihpui hle a, mahse he thu hi chu kan la ngaihtuah zel ang a, thutlukna pawh la siam chhoh tur a ni ang,” an ti. Dan hmaa kal an tum hmel khawp mai a, an estate lawyer chuan Jenner te hnenah hian lehkha pawh a thawn nghe nghe.

Kendall Jenner chuan hrehawm a tih phah hle. Hollywoodlife-in a tarlan dan chuan a rilru nasa takin a nuam lo. An thil tih tum chu t-shirt hmaa an tarlante hi an ngaihsanzia lantir a ni a, an tum loh anga thil thleng hian a barakhaihin hrehawm an tih phah hle.