Intodelh turin Bella Hadid a thawkrim

Kum 25 tlin tawh hnu pawha “Ka nu khawi maw" tih chu a hla lutuk, Bella Hadid hian a intodelh theihna turin hna a thawk rim a, a nu leh pa neih sum ring lo a, mahni kutke ngeia a din theih nan hna a thawk nasa hle tih a zep lo.

Kum 20 mi model hi kum 18 a tlin khan a apartment luah man takngial pawh aman a thawk chhuak vek tawh. A pa, Mohamed Hadid hi mi rethei a ni lo, real estate lama hlawhtling, mi hausa, a fate duh duh leisak thei a ni. Mahse Bella Hadid hian a pa neih leh thawh chhuah hmanga lo inlak leh intihchangkan a tum ngai lo a, ama kutkawih ngeia a intodelh theih nan hna a thawk nasa hle.

“Kum 18 ka tlin kha chuan zaa zain ka intodelh tawh a, ka apartment luah man pawh keiman ka thawk chhuak vek. Ka nu leh pa hnen aṭanga pawisa ka dawn hmanga pe ka ni lo a, rim taka kum hnih chhung hna ka thawh vang a ni,” a ti.

Modelling industry-ah a lut a, model ṭha an tam a, chung zingah chuan hlawhtling leh hriat hlawh ni turin theihtawp a chhuah. Chutianga hlawhtling tur chuan ei leh in, zuk leh hmuam leh ruihtheih thil thlengin kawng tam takah insum a ngai. A taksa a fit a, a pian a lan mawi theihna turin zingah duh hun huna thawh ngawt theih a ni hek lo. Bella Hadid hian a bei nasa hle. A hna hi a chân thut ang tih a hlauh avangin zan muthilh theih loh chang a nei fo bawk.