Michael Jackson nun a zalen lo
In lian pui a nei a, sum a nei a, khawvelah a lar em em bawk. Hei hi mi tam takin an thlakhlelh a ni a, mahse hemi piah erawh kan ngaihtuah lo ṭhin. Michael Jackson pawh kha awhawm tak niin lang mah se, a nun a zalên lo a, hlauhthawnnaa a khah avangin nun awhawm tak a ni lo.
Michael Jackson-a note ziah tarlanah, a thih hma lawk aṭang khan hlauhthawn lian tak a nei a, miin an that mai ang tih a hlau a, chu chuan a nun a tiralṭi hle. Michael Jackson kha July 2009 aṭanga March 2010 chhunga O2 Arena, London-a concert vawi 50 nei tura biak vek tawh a ni. A tihhlawhtlin hmain, June 2009 khan a thi ta a ni.
A thih hma lawka note a ziah an tar chhuahah hian Jackson khan a nunah hlauhthawnna lian tak a nei a, miin thah an tum anga ngaihna a nei. Jackson lehkha pakhat, German businessman, Michael Jacobshagen-a kuta lutah phei chuan O2 Arena-a show a neih tura promoter-te hial a sawi lang. Jacobshagen nen hian hunrei tak aṭanga lo inṭhian tawh an ni.