P. Diddy-a’n America hi racist ram niin a sawi

Hip-hop star hlawhtling leh hausa, P. Diddy chuan America ram chu racist ram niin a sawi a, president-ah meuh pawh midum nei tawh mah se, midumte an thlir dan leh midumte an enkawl dan chu human right crime niin a sawi.

P. Diddy hian America chuan hman aṭang tawhin chi inthliarna hi a rochung chhawng zel niin a sawi. US president atan Obama thlan tlin ni mah se, America mite rilruah hian chi in­thliarna hian thuk takah zung a kaih a ni a ti. “Kum heti chen a liam hnuah leh midum president kan neih tawh hnuah pawh kan dinhmun chu a hniam ber a la ni tho a ni,” a ti.

“Tuman hetianga nun reng hi an duh tawh bik lo a, tu nu leh pa mahin miin an thah mai mai turin an fate an phal hek lo. Mitin hi kan inzah thiam tlang tur a ni,” a ti. Kum 47 mi hip hop star hian African American te enkawl an nih dan chu ‘human rights crime’ tiin a sawi a, “African-American te miin an thlir dan leh an en dan chu human right crime a tling. Chu chu mi thah te, chaw ngheia dah leh lehkha zirtir loh te nen ang khat a ni. Mi hnuaichhiah leh rahbeh a, an dikna leh chanvo pek ve loh hi human rights crime a ni,” a ti.