DJ Khaled-a number one pahnihna
Billboard 200 chart-ah chuan DJ Khaled album tharin pakhatna a luah. DJ Khaled album thar hi ‘Grateful’ a ni a, kar liam ta chhung khan copy 149,000 hralh a ni a, pakhatna a luah chiang hle.
DJ Khaled album thar ‘Grateful’ hi pakhatna luah ta lo se, DJ Khaled hi a turu tawk lo tihna a nih mai bakah, Justin Bieber te, Quavo te, Chance The Rapper leh Lil Wayne te hian fans an ngah tawk lo tihna a ni ang. He album hi DJ Khaled-a siam chu ni teh meuh mah se, tunlaia zaithiam lar ber ber a zaipui avang hian pakhatna a nih loh beisei a har. He album-a ‘I’m the one’ hla chu Justin Bieber, Quavo, Chance the Rapper leh Lil Wayne te nena an sak a ni. He hla avang chauh pawhin copy tam tak chu an hralh phah ngei ang. Chu bakah ‘Wild Thoughts’ hla chu Rihanna leh Bryson Tiller te nena an sak a ni a, hei ngawt pawh hi hralh chhan tham a tling.
‘Major Key’ album hmangin DJ Khaled hian Billboard album chart-ah hian pakhatna a lo luah tawh a, ‘Grateful’ hi pakhatna vawi hnih a luahna a ni. ‘Grateful’ album copy 149,000 hralh zinga copy 50,000 hi album pangngai a ni.
Imagine Dragons album thar ‘Evolve’ chu copy 147,000 zet hralhin pahnihna a luah. DJ Khaled hian milar dang zaipui vak lo se chuan Imagine Dragons album thar hi pakhatna a nih ngei a rinawm a, album pangngai hralh hnem lamah pawh Khaled hi an khum hle a, album pangngai an hralh hi copy 109,000 zet a ni. Kumin chhunga chawlhkar khat chhunga rock album hralh hnem pathumna a ni.
Kendrick Lamar-a album ‘DAMN’ hi a tlahniam hlei thei lo a, pathumna a la luah thei tho mai. Kar liam ta chhung khan copy 59,000 lai a la hralh. Prince album ‘Purple Rain’ chu top 4-ah a rawn lang thar leh a, copy 52,000 a hralh. A chhan ber nia lang chu deluxe remastered chu June 23 aṭang khan an hralh chhuak a, hei hian a vawrh chho a nih hmel.
Billboard 200
“Grateful” - DJ Khaled (149,000)
“Evolve” - Imagine Dragons (147,000)
“DAMN” - Kendrick Lamar (59,000)
“Purple Rain” - Prince (52,000)
“Pretty Girls Like Trap Music” - 2 Chainz (43,000)
“Mosaic” - 311 (39,000)
“Divide (division sign)” - Ed Sheeran (36,000)
“More Life” - Drake (34,000)
“24K Magic” - Bruno Mars (32,000)
“Moana” Soundtrack - Various Artists (29,000)