David Vanlalpeka Ṭhalaite fuihna hla thar

‘Immanuel’ tih a siam hnu khan solo music video kan hmu ta mang lo. Nikum kum tawp lam khan an ṭhianhoa music video an siam ‘Lo kir ang che’ tih kan hmu leh. Kuminah kum chanve kan hmang tling ta a, kum chanve a kal meuh chuan David Vanlalpeka solo music video kan hmu leh ta.

Kum khat deuh thaw hnua David Vanlalpeka solo music video kan hmuh leh hmasak ber hi ‘Lalpan a sawm a che’ tih hla a ni a, Laldinsanga phuah a ni. Lal­dinsanga hi Mystique School of Music-a keyboard instructor kha a ni. Ace-ah record a, video hi RK Graphix kutchhuak a ni.

David-a chuan, “’Lalpan a sawm che’ tih hi Mizo Kristian zaa za kan intihna ramah hian duhâmna, eirukna leh sual lam kawnga ṭhalai tam tak an peng bo mai tur infuihtharna atana siam a ni. Kan thil tih dik loh kan hriat reng site hi Pathian vanga kan thlauhthlak a, kan intuaithar leh theih nan min chotu a nih beiseina nena phuah a ni,” a ti.

Solo-a music video a neih inkar a inhlat hle a, a chhan sawiin, Synod Mission Choir-ah a awm a, chuvang chuan ama solo lam a ngaihtuah hman lo. SMC-a a term a zo ta a, tunah chuan a hman ta deuh a, hmachhawp pawh a nei chho nghal nual. Tunah hian hla pakhat buaipui mek a nei a, lehlin a ni a, BZA kutchhuak a ni. Shooting erawh an la ṭan lo. Vai rama shoot tuma inbuatsaih an ni a, fur khawhnâwm lai a nih avangin hma an la la thei tak tak lo.

David-a hian inneih hla siam mai tur pawh a nei. “Inneih hla hi Mizotena kan ngah loh tak mai a ni a, chuvang chuan inneih hla music video pawh ka siam ang,” a ti. “Kumin chu zaipawl lamah pawh ka awl ta deuh a, hma ka la chho tak tak ang,” a ti bawk.