Kum 2050-ah chuan sangha aiin plastic a tam zawk dawn!

Mithiamte leh thil hre zawkte mang ti-angtu lian tak pakhat chu plastic kan hmang nasa ta lutuk leh, plastic avanga kan lui leh tuipui a bawlhhlawh tak zia hi a ni. Mithiam­te chuan kum 2050 khi chuan tuipuiah hian sa­ngha aiin plastic a tam tawh zawk ang an ti hial!

Mithiamten an chhut dan chuan minute tin hian plastic ûm makta­duai khat zel hralh ang a ni a, tun ang zela plastic ûm kan hmang nasa a nih chuan kum 2021 khi chuan tuna kan hman aia zaa 20 zetin plastic ûm hi kan hmang hnem tawh zawk ang. Hetianga plastic ûm kan hman nasat lai hian recycle erawh a tlem hle. Nikum chhung khan plastic ûm kan thehthang mai mai zinga a zatve chauh recycle a ni an ti.

Nikum chhung khan plastic ûm tluklehding­awn 480 zet hralh chhuah a ni a, a hma kumte kha chuan kum khatah ûm tluklehding­awn 300 ang hu vel a ni. China leh Asia-Pacific Region huam chhungah plastic ûm hman an intihhmuh nasa a, hei hi khawvel tana pawi tham khawpa tam a ni.

Kum 2012 khi chuan plastic ûm kum khata kan hman chu tluklehdingawn 538.3 a tling tawh dawn niin Euromonitor International chuan a tarlang. Surfers Against Sewage group-a mi, Hugo Tagholm chuan, “Climate Change ang bawka buaipui awm ta chu plastic pollution hi a ni a, khawvel hmun tinreng hi a tibawlhhlawh a, leilung inbuktawk tura siam hi nasa takin a tidang­lam a ni,” a ti.

Tunhnaia zirchianna an tihchhuahah chuan kum 2050 khi chuan tuipuiah hian sangha aiin plastic ûm a tam tawh zawk dawn niin a sawi. Kum tin hian plastic ûm ton maktaduai 8 chuan tuipui a thleng thla ziah a, chu chu minute tin truck trip khat tuipuia paih ziah ang a ni. Tunah hian tuipuiah plastic ûm ton maktaduai 150 vel a awm mek nia chhut a ni.