Zualbawihi album thar tlangzarh

Nimin chawhma dar 11 khan Zualbawihi music video album pathumna, ‘Malay ka vahvaih nak’ chu I&PR Auditorium-ah tlangzarh a ni a, minister Ngunlianchunga’n a tlangzarh.

Mizo Idol aṭanga kan hriat lar Zualbawihi music video album thar ‘Malay ka vahvaih nak (Malay ka vahvaihna) hi Lai hla khungkhawmna a ni a, Thangve hla phuah te a ni. Thangve hi Australia-a awm mek a ni a, a hun tawn hrang hrang, harsatna hrang hrang a tawh aṭangtein hla a phuah a, a hla sa tur hian Zualbawihi hi biain, Zualbawihi hian album hi a siam ta a ni. Thangve hian a album siamna senso a rawn tum vek bawk.

First Clas-a BA pass thar Zualbawihi album tharah hian hla 14 a awm a, music video nen veka dah a ni. Zualbawihi hian zirna a zo ta rih bawk a, nasa lehzuala music lama inhman chhoh a tum mek a, YouTube-ah te pawh channel a siam fel tawh. Album tlangzarhnaah hian Zoramchhani, Lalchhanchhuaha leh amah Zualbawihi an zai.

‘Malay ka vahvaih nak’ album-a hla, Thangve phuahte hi hman lawka hla phuah thiam kan ṭhen tak, Dokamlova hla thluk siam a ni. Dokamlova hi Khawzim, Myanmar-a mi a ni a, Zo rimawi khawvelah hnuhma a ngah hle. RTC Lalduhawmi’n thiam taka a lo sak ṭhin ‘Châm rih rawh kan vangkhuaah hian’ tih te, RD Renthlei sak ‘Nunrawng hmelṭha’, Zosang­liani sak ‘Hmangaih lehkhathawn’, C. Vansanga sak ‘Suihlunglen’ tihte kha a phuah a ni.