Britney Spears Jerusalem-ah lal angin a lut!

Ram Thianghlima Britney Spears-i’n ke a nghat chiah mai chu a rik hian a ri nghal hulh hulh a ni ber mai. Jerusalem-a Ṭahna Bang leh hmun pawimawh dangte tlawh tumin a kal a, mahse a duh hunah a duh hmun a thleng thei lo. Mipui pungkhawm an tam lutuk a, a thil tih tum ṭhenkhat a ṭhulh phah.

Ram Thianghlima Khawpui Thianghlim a lut zet chu lal angin he Jerusalem khawpuiah hian a lut a ni ber e. Amah hmuh a, ‘A puan hmawr tal pawh dek ila’ ti mi an ṭhahnem lutuk a, meeting pawimawh tak a neih tur pawh a ṭhulh phah. Ṭahna Bang a tlawhnaah amah khawih a, chibai ve ngei ngei tum an tam lutuk a, a duh aia rei hun a hmang phah.

Britney hian Pa­thianni khan Israel a thleng a, Tel Aviv-a concert a neih hma hian Israel hmun thianghlim, Ṭahna Bang chu Pathianni tlai khan a tlawh a, mipuiin a bawm­in an bawm a ni ber. Mipui bawrtu a ngah lutuk avangin Israel prime minister, Benjamin Netanyahu nena an meeting tur pawh a ṭhulh phah. Netanyahu nen hian naupang cancer natna veite enkawl chungchang sawi dun tur an ni.

Hetianga a thil tih tum a ṭhulh leh tak si avang hian mipui an lungawi lo a, Prime Minister office lam an mawhpuh ta thung. Mipuite hian Prime Minister office chu thu tihchhuah hmanhmawh lutukah an puh a, amah Britney chhanna pawh nghak zo loah ngaiin, meeting ṭhulh a nih chhanah Prime Minister office chu khenbeh an duh hial a ni ber e.

Britney Spears hi Thawhṭanni zan khan Tel Aviv-a Yankon Park-ah a concert. Britney hian tour a nei a, Tel Aviv hi Asian leg tour-a show a neih hnuhnun ber a ni. A hmain Singapore, Hong Kong, Bangkok, Seoul leh Tokyo-ah te concert a nei.