Imagine Dragons Billboard Artist 100-ah pakhatna
Billboard 200 chart-ah an album thar ‘Evolve’ chuan DJ Khaled album tluk pha lo mah se, Billboard Artist 100-ah erawh DJ Khaled hian Imagine Dragons a pha lo. Billboard Artist 100-ah Imagine Dragons hi pakhatnaah an awm.
Billboard Artist 100-ah hian zaithiam leh band te album an hralh hnem dan te, hla mala an hralh hnem dan te, stream nasat an nih leh nih loh te, social media-a fan-tena an sawi chhawn dan leh fan-te sawi dan aṭangtea teh a ni. Imagine Dragons hi kar hmasa khan pariatna an ni a, tunkarah pakhatnaah an rawn lawn ta a ni.
Imagine Dragons hi pakhatnaah an awm theihna chhan lian ber chu an album ‘Evolve’ an hralh hnem hi a ni. Artist 100-a pakhatna ni tura an point hmuh zawng zawng zaa 67 hi an album hralh aṭangin a ni. Digital song an hralhna aṭangin an point hmuh zaa 17 an hmu bawk.
DJ Khaled pawh pahnihnaah a awm. A hmain Khaled hi pangana a ni a, pahnihnaah a chho a, ani ai hian Imagine Dragons chu an rawn zuang sang zawk. Pakhatna aṭangin Bruno Mars chu pathumnaah a chhuk thla a, Ed Sheeran pawh pahnihna aṭangin palinaah tla thlain, Kendrick Lamar chu palina aṭangin panganaah a chhuk.
IMAGINE DRAGONS
Chhuahna Las Vegas, Nevada
Genre Alternative rock, indie rock, pop rock, pop electropop
Members Dan Reynolds
Wayne Sermon
Ben McKee
Daniel Platzman
Member Ṭhin Andrew Tolman
Brittany Tolman
Theresa Flaminio
Dave Lemke
Andrew Beck
Aurora Florence
Album tihchhuah
Night Visions (2012)
Smoke + Mirrors (2015)
Evolve (2017)